|
The
bride came out of the byre,
And O as she dighted her cheeks,
Sirs, I'm to be married the night,
And has neither blankets, nor sheets,
Neither blankets nor sheets,
Nor scarce a coverlet too.
The bride that has a'thing to borrow,
Has e'en right meikle ado.
Chorus:
Woo'd and married and a'
Woo'd and married and a',
An was nae she very weel aff,
That was woo'd and married and a'.
Out spake the bride's father,
As he came in frae the plough,
O had ye're tongue, my doughter,
And ye's got 'gear enough;
The stirk that stands i' th' tether,
And our bra' basin'd yade
Will carry ye hame your corn;
What wad ye be at, ye jade?
Chorus
Out spake the bride's mither,
What de'il needs a' this pride!
I had nae a plack in my pouch
That night I was a bride;
My gown was linsy-woolsy,
And ne'er a sark ava;
And ye hae ribbons and buskins,
More than ane or twa'.
Chorus
|
What's
the matter, quo' Willie,
Tho we be scant o'claiths,
We'll creep the nearer the gither,
And we'll smore a' the fleas;
Simmer is coming on,
And we'll get teats of woo;
And we'll get a lass o' our ain,
And she'll spin claiths anew.
Chorus
Out spake the bride's brither,
As he came in wi' the kie,
Poor Willie had ne'er a tane ye,
Had he kent ye as well as I;
For you're both proud and saucy,
And nae for a poor man's wife;
Gin I canna get a better,
Ise never take ane i' my life.
Chorus
Out spake the bride's sister,
As she came in frae the byre,
O gin I were but married!
It's a' that I desire;
But we poor fo'k maun live single,
And do the best we can;
I dinna care what I shou'd want,
If I cou'd get but a man.
Chorus
|
|
Return
to Home Page
